काठमाडौं । कर्मचारी सञ्चय कोषले चालू आर्थिक वर्ष २०८०।८१ को पहिलो छ महिनामा सामाजिक सुरक्षा अन्तर्गत सञ्चयकर्ता र आश्रित परिवारलाई २५ करोड रुपैयाँ वितरण गरेको छ। कोषले प्रकाशन गरेको त्रैमासिक पत्रिका अनुसार कोषले यो अवधिमा २५ करोड ३३ लाख रुपैयाँ सामाजिक सुरक्षावापत सञ्चयकर्तालाई वितरण गरिएको हो ।
कोषले साधारण रोगको उपचारवापत २ हजार २१२ सञ्चयकर्तालाई ८ करोड १२ लाख रुपैयाँ बराबरको घातक रोगको उपचारका लागि ४७० सञ्चयकर्तालाई ७ करोड ४३ लाख रुपैयाँ सुत्केरी तथा शिशु स्याहार अन्तर्गत ९ हजार ६९१ जनालाई ७ करोड २६ लाख रुपैयाँ राहत उपलब्ध गराएको छ। कोषका अनुसार काजकिरिया अनुदानवापत ३४६ जना सञ्चयकर्ताको परिवारजनलाई कूल १ करोड १२ लाख रुपैयाँ वितरण गरिएको छ। यसबाहेक दुर्घटनामा परी ज्यान गुमाएको ५६ जना सञ्चयकर्ताको आश्रित परिवारलाई १ करोड १२ लाख रुपैयाँ उपलब्ध गराइएको छ।
कोषले घातक रोग उपचारका लागि एकजना सञ्चयकर्तालाई सेवा अवधिभर बढीमा १० लाख रुपैयाँ उपलब्ध गराउँछ। साधारण रोगको उपचारका हकमा भने वर्षको १ लाख रुपैयाँसम्मको सुविधा उपलब्ध गराई रहेको छ। उपचार खर्च सुविधा सञ्चयकर्ता दम्पत्तीको हकमा नै लागू हुन्छ।
