काठमाडौं । कैलालीको चिसापानीस्थित कर्णाली पुलमाथि गुड्दै गरेको अवस्थामा आगलागी भएको ट्रकको करिब सवा करोड रुपैयाँ बराबरको बीमा रहेको जानकारी प्रकाशमा आएको छ। सम्बद्ध श्रोतका अनुसार सगरमाथा लुम्बिनी इन्स्योरेन्स कम्पनी लिमिटेडमा १ करोड २७ लाख रुपैयाँ बीमांकको सो ट्रकमा लोड गरिएको सामानको बीमा गरिएको छ।
वीरगंजबाट धनगढीतर्फ जाँदै गरेको ना ५ ख ५२९७ नम्बरको मालबाहक ट्रक कर्णाली पुलमाथि गुड्दै गरेको अवस्थामा साँझ करिब ६ बजेतिर एक्कासी आगलागी भएको थियो । आगलागीका कारण ट्रक र त्यसमा लोड गरिएको सबै मालसामान नष्ट भएको छ भने ट्रकको आगो पुलको फलामे तारमा समेत सल्किएको छ। ट्रकमा प्रज्वलनशील पदार्थ भएको लाइटर लोड गरिएकाले आगलागी नियन्त्रणमा लिन सुरक्षाकर्मीहरुलाई चुनौती भइरहेको छ।
