काठमाडौं । स्वरोजगार लघुवित्त वित्तीय संस्थाले १५ औँ वार्षिक साधारणसभा आह्वान गरेको छ। संस्थाको बुधबार (फागुन २ गते) बसेको सञ्चालक समितिको बैठकले वार्षिक साधारणसभा फागुन २६ गते आयोजना गर्ने निर्णय गरेको हो। सभा काठमाडौंको हात्तीसारस्थित नेपाल हाउसमा बिहान ११ः३० बजेबाट सुरु हुनेछ।
सभाले आर्थिक वर्ष २०७९/८० का लागि प्रस्तावित कुल ७.३६८४ प्रतिशत लाभांश अनुमोदन गर्नेछ। जसमा ७ प्रतिशत बोनस शेयर र कर प्रयोजनार्थ ०.३६८४ प्रतिशत नगद लाभांश छन्।
सभाले सर्वसाधारणमा थप सार्वजनिक निष्कासन (एफपीओ) जारी गर्ने विशेष प्रस्ताव पारित गर्नेछ। बोनस शेयर वितरण र एफपीओ जारीपछि संस्थाको जारी तथा चुक्तापुँजी वृद्धि हुने भएकोले सोहीबमोजिम संस्थाको प्रबन्धपत्र संशोधन गर्ने प्रस्ताव सभाले अनुमोदन गर्नेछ।
सभाले अन्य एक वा एकभन्दा बढी लघुवित्त संस्थासँग मर्जर र प्राप्ति प्रक्रिया अगाडि बढाउन उपयुक्त देखिएमा सम्पूर्ण कार्य गर्ने अख्तियारी सञ्चालक समितिलाई प्रदान गर्ने प्रस्ताव पारित गर्नेछ। सभाले गत आर्थिक वर्षको वार्षिक तथा लेखापरीक्षकको प्रतिवेदन स्वीकृत गर्नेछ।
लाभांश र सभा प्रयोजनार्थ संस्थाले फागुन १३ गते बुक क्लोज गर्ने निर्णय गरेको छ। यसको मतलब फागुन १० गते (फागुन ११ गते शुक्रबार र फागुन १२ गते शनिबार)सम्म कायम शेयरधनीहरुमात्रै यो संस्थाको लाभांश पाउन र सभामा लिन योग्य हुनेछन्।
