काठमाडौं । पछिल्लो १ वर्षको अवधिमा मोबाइल बैंकिङ प्रयोगकर्ता साढे १४ प्रतिशतले बढेका छन्।
नेपाल राष्ट्र बैंकले सार्वजनिक गरेको तथ्यांकअनुसार चालु आर्थिक वर्षको मंसिरम्म मोबाइल बैंकिङ प्रयोगकर्ताको संख्या २ करोड २६ लाख २४ हजार ६०७ पुगेको छ। अघिल्लो वर्ष मंसिरसम्म यो संख्या १ करोड ९७ लाख ६६ हजार ४१५ थियो।
यो वर्षको मंसिरसम्म मोबाइल बैंकिङबाट २ खर्ब ६३ अर्ब ४६ करोड ४० लाख रुपैयाँबराबरको भुक्तानी भएको छ। अघिल्लो वर्ष यही अवधिसम्म मोबाइल बैंकिङबाट १ खर्ब ६० अर्ब ३ करोड ६० लाख रुपैयाँबराबरको भुक्तानी भएको थियो। यो हिसाबले मोबाइल बैंकिङबाट हुने कारोबार पनि ६.४६ प्रतिशतले बढेको छ।
इन्टरनेट बैंकिङ प्रयोगकर्ताको संख्या भने १ प्रतिशतले बढेर यो वर्षको मंसिरसम्म १७ लाख ८८ हजार ६५७ मा पुगेको छ। अघिल्लो वर्ष मंसिरसम्म इन्टरनेट बैंकिङ प्रयोगकर्ताको संख्या १७ लाख ७० हजार ९३७ थियो।
