काठमाडौं । साइबर ब्यूरोले सामाजिक सञ्जाल टिकटक चलाउनका लागि भिपिएन र डिएनएस प्रयोग नगर्न आग्रह गरेको छ । सरकारले टिकटक चलाउन प्रतिबन्ध लगाएसँगै पछिल्लो समय सामाजिक सञ्जाल टिकटक चलाउनका लागि भिपिएन डाउनलोड गर्ने र डिएनएस प्रयोग गरी टिकटक चलाउने प्रयोगकर्ता बढेका छन् । सोही सम्बन्धमा प्रविधिको दुरुपयोग भएको भन्दै यस्ता प्रविधिहरु प्रयोग नगर्न साइबर ब्यूरोले सबैलाई आग्रह गरेको हो ।
नेपाल सरकारको मन्त्रीपरिष्दको बैठकले कात्तिक २७ गते, टिकटक बन्द गर्ने निर्णय गरेको थियो । यद्यपी हाल टिकटक भिपीएन र डिएनएस जस्ता असुरक्षित अवैध माध्यमबाट सञ्चालन भइरहेको समेत प्रहरीले जनाएको छ ।
भिपीएन र डिएनएस प्रयोग गर्दा प्रयोगकर्ताको डिभाइमा रहेका महत्वपूर्ण डाटा, बैंकिंग विवरणहरुको समेत पहँच पुर्याइ चोरी भएको र आर्थिक दुरुपयोगका घटना साइबर सुरक्षाको दृष्टिकोणले समेत बढिरहेको छ । त्यसकारण पनि भिपीएन र डिएनएस नचलाउन आग्रह गरेको हो ।
