काठमाडौं । कर्णाली प्रदेशको दुई जिल्ला जाजरकोट र रुकुम पश्चिममा गएको ६.४ रेक्टर स्केल क्षमताको भूकम्पमा सर्वसाधारणले झण्डै साढे दुई करोड रुपैयाँ बराबरको पशुपंक्षी गुमाएका छन् । पशु सेवा विभागका अनुसार कात्तिक १७ गतेको भूकम्पमा स्थानीय किसानले झण्डै १ हजार पशुपंक्षी गुमाउँदा २ करोड ५१ लाख रुपैयाँ बराबरको क्षति भएको प्रारम्भिक अनुमान गरिएको छ।
पशु सेवा विभागका अनुसार भूकम्पका कारण जाजरकोट जिल्लामा ६ सय २२ पशुपंक्षी र रुकुम पश्चिममा ३ सय ५१ पशुपंक्षी मरेका छन् । घाइते ६ सयभन्दा धेरै पशुको उपचार भइरहेको छ ।
चीसो माैसमका कारण अधिकांश चौपाया चरन खर्कमा लगिएकाले तुलनात्मकरुपमा क्षति थोरै भएको सरकारी अधिकारीहरुको भनाई छ। क्षति भएकामध्ये एकदमै न्यून संख्यामा मात्र पशुपंक्षीको बीमा गरिएको हुनसक्ने सरकारी अधिकारीहरुको अनुमान छ।
