काठमाडौं । बीमा कम्पनीहरु पुरानो बीमा ऐन २०४९ अनुसार नविकरण नै नभइ सञ्चालन भएको पाइएको छ । बीमा ऐन २०४९ को दफा ११ मा बीमा कम्पनीहरुले चैत मसान्त भित्रमा नविकरण गर्नु पर्ने व्यवस्था छ । बीमा कम्पनीहरुले ऐन अनुसार नविकरण नगर्दा अहिले आएर समस्या देखिएको हो ।
गएको कार्तिक २२ गतेदेखि लागु भएको नयाँ बीमा ऐन २०७९ मा बीमा कम्पनीले नविकरण गर्न नपर्ने व्यवस्था गरिदिएको छ । यस ऐन अनुसार यहि कार्तिकमै बीमा कम्पनीहरुले नविकरण गर्न नपर्ने कानुन विदहरुको राय छ । तर बीमा प्राधिकरणले बिहीबार एउटा सूचना जारी गर्दै पुरानो बीमा ऐन २०४९ को व्यवस्था बमोजिम रिन्यु फेल भएका कम्पनीहरुलाई यहि २०७९ चैत मसान्तसम्ममा अन्तिम पटकका लागि नवीकरण गर्न निर्देशन दिएको छ ।
प्राधिकरणको यस्तो निर्देशनले बीमा कम्पनीहरु नविकरण बीनानै सञ्चालन भएको देखिएको हो । पुरानो व्यवस्था अनुसार गत वर्षको चैत मसान्तमा नविकरण गरेका बीमा कम्पनीको लाइसेन्स यहि चैत मसान्तसम्मका लागि योग्य रहन्छ । यसै ऐनको दफा ११ को उपदफा एकमा चैत मसान्त भित्रमा नविकरण गर्नु पर्ने व्यवस्था रहेको छ भने उपदफा २ मा नविकरण नगर्ने बीमा कम्पनीहरुलाई ३० दिनको म्याद दिन सक्ने व्यवस्था छ ।
तर अधिकाम्स पुराना बीमा कम्पनीहरुले नविकरण नै नगरेको पाइए पछि प्राधिकरणले पुरानै व्यवस्था अनुसार यहि चैत मसान्त भित्रमा नविकरण गर्न सूचना जारी गर्नु परेको हो । गएको चैतमा नविकरण गरेका बीमा कम्पनीहरुले भने नविकरण गर्नु नपर्ने प्राधिकरणले जनाएको छ ।
