काठमाडौं । नेपाल टेलिकमले चालु आर्थिक वर्षको ६ महिनाको अवधिमा ४ अर्ब २५ करोड रुपैयाँ मुनाफा आर्जन गरेको छ । कम्पनीले गत आर्थिक वर्षको यहि अवधिको तुलनामा ९.१६ प्रतिशतले मुनाफा बढाउन सफल भएको छ । गत वर्षको यहि अवधिमा खुद मुनाफा तीन अर्ब ८९ करोड रुपैया थियो ।
टेलिकमको सञ्चालन आम्दानी भने ५.८८ प्रतिशतले घटेको छ । समिक्षा अवधिमा टेलिकमले १८ अर्ब ७ करोड रुपैयाँ आर्जन गरेको छ । गत वर्षको यहि अवधिमा १९ अर्ब २० करोड रुपैयाँ थियो । अन्य आम्दानी भने ४४ प्रतिशतले बढेर ४ अर्ब २ करोड रुपैयाँ आर्जन गरेको छ ।
टेलिकमको चुक्ता पूँजी २० प्रतिशतले बढे पनि मुनाफामा सुधार हुँदा प्रतिशेयर आम्दानी ४३ रुपैयाँबाट बढेर ४७ रुपैयाँ पुगेको छ । हालको चुक्ता पूँजी १८ अर्ब रुपैयाँ रहेको छ भने जगेडा कोषमा ७४ अर्ब ३२ करोड रुपैयाँ जम्मा भएको छ । लाभाश वितरण पछि जगेडा कोष ५ प्रतिशतले घटेको छ ।
