काठमाडौं । चरम घाटामा रहेको भन्दै भाउ घटाउन नमानेको नेपाल आयल निगमलाई प्रधानमन्त्री पुष्पकमल दाहालले तत्काल पेट्रोलियम पदार्थको मूल्य घटाउन निर्देशन दिएका छन् । प्रधानमन्त्री प्रचण्डले उद्योग, वाणिज्य तथा आपुर्ती सचिवलाई कार्यालयमै बोलाएर तत्काल मूल्य घटाउन निर्देशन दिएका हुन् । अन्तर्राष्ट्रिय बजारमा पेट्रोलियम पदार्थको मूल्य घटिरहेको सन्दर्भमा नेपालमा पनि घट्नु पर्ने उनको तर्क छ ।
हाल आयल निगमलाई पेट्रोलमा प्रतिलिटर २.५४ रुपैयाँ, डिजेलमा २.९५ रुपैयाँ र हवाई इन्धनमा प्रतिलिटर ४.१३ रुपैयाँ मुनाफा रहेको छ । एल.पि ग्यासमा भने प्रति सिल्डर ३५९ रुपैयाँ नोक्सान रहेको छ । यहि हिसावले नगमलाई १५ दिनमा ९९ करोड रुपैयाँ मुनाफा हुने देखिएको छ । निगमले इन्डियन आयल कर्पोरेसन र ऋण समेत गरि अझै १८ अर्ब रुपैयाँ तिर्न बाँकी रहेको छ । यहि घाटा परिपुर्ती गर्न भाउ नघटाइएको निगमले जनाएको छ ।
