वीरगंज। स्थानीय यूवा उद्यमीहरुको संयुक्त लगानीमा रहेकाे रियल स्टिल प्रा.लि. फलाम उद्योगले एक वर्षको अवधिमा १८.७३ प्रतिशतले कारोबार बढाएको छ । कम्पनीको व्यापारिक कारोबार बारे उपलब्ध अपरिस्कृत तथ्यांक अनुसार आर्थिक वर्ष २०७८।७९ मा कम्पनीले १ अर्ब ३७ करोड ५० लाख रुपैयाँको कारोबार गरेको छ ।
यसअघि आ.व. २०७७।७८ मा कम्पनीले १ अर्ब १५ करोड ८० लाख रुपैयाँको कारोबार गरेको रेटिङ एजेन्सी केयर रेटिङले सार्वजनिक गरेको प्रेस विज्ञप्तीमा उल्लेख छ ।
वीरगंजमा अवस्थित यो उद्योगले फलामको एम एस पाइप, सटर पटी, सटर गाइड, एचआर क्वायल, सिआर क्वायल, लक प्लेट, कान प्लेट र सटर स्प्रिङ उत्पादन गर्दै आएको छ । सन् २०२० को शुरूवातदेखि उत्पादन थालेको यो कम्पनीको उत्पादन क्षमता वार्षिक ४९ हजार ८ सय मेट्रिक टन रहेको छ ।
कम्पनीले उत्पादन तथा सेवामा विविधतालाई जोड दिंदै तयारी छानाको उत्पादन (प्रि फ्याब्रिकेटेड ट्रस सेड र यसको लागी जडान सेवा समेत यसवर्ष देखि शुरू गरेको छ ।
कम्पनीले १ अर्ब ५० करोड रुपैयाँ बैंकिङ कर्जाका दोश्रो पटक केयर रेटिङ बाट गराएको जोखिमांकनमा पुरानै रेटिङमा समर्थन प्राप्त गरेको छ ।
अमेरिकी मुद्रामा उद्योगको कच्चा पदार्थ खरिद गर्नु पर्ने र अत्यधिक चालू पूँजी आवश्यक हुने भएकाले समयमै वित्तीय दायीत्व निर्वाह गर्न सक्ने सन्दर्भमा औसत जोखिमको अवस्थामा रहेको छ ।
१ अर्ब ७ करोड ५० लाख रुपैयाँ अल्पकालीन कर्जाको लागी केयर एनपि ए फोर र ४३ करोड रुपैयाँ दीर्घकालीन कर्जाको केयर एनपि बिबि माइनस रेटिङ पाएको छ ।
