काठमाडौँ । नेपाल राष्ट्र बैंकले बैंक तथा वित्तीय संस्थाले कर्जा प्रवाह गर्दा कर्जाको साँवा र ब्याजको भार धान्ने गरी बीमा गर्नुपर्ने प्रावधान ल्याएको छ । आर्थिक वर्ष २०७९।८० को लागी मौद्रिक नीति सार्वजनिक गर्दै बैंकका गभर्नर महाप्रसाद अधिकारीले यस्तो प्रावधानको घोषणा गरेका हुन् ।
मौद्रिक नीतिमा सुरक्षणवापत धितो बन्धकी राखिएको सम्पत्तिको बीमा गर्दा बैंक वित्तीय संस्थाले लगानी गरेको कर्जाको सम्पूर्ण वित्तीय जोखिम बहन गर्न पर्याप्त हुने गरी बीमांक कायम गर्नुपर्ने घोषणा व्यवस्था गरिएको हो । धितो सुरक्षण लिएर कुनै पनि कर्जा प्रवाह गर्दा अनिवार्यरुपमा बीमा गर्नुपर्ने प्रावधान छ । तर कर्जावापतको सम्पूर्ण रकमको जोखिम बहन हुने गरी नगरी बैंक तथा वित्तीय संस्थाले ठूला ऋणीहरुको अनुरोधमा कर्जा रकमभन्दा थोरै मूल्य बीमांक कायम गरेर बीमा गर्दै आएका थिए ।
यो नीतिका कारण अब निर्जीवन बीमकहरुको सम्पत्ति बीमावापतको आम्दानीमा उल्लेखनीय वृद्धि हुने अपेक्षा गरिएको छ ।
