काठमाण्डौं । मुलुकको अर्थतन्त्रको मेरुदण्ड सरह भूमिका निर्वाह गर्दै आएको विप्रेषण आप्रवाह(रेमिटेन्स) आम्दानी घट्दै गएपछि सरकारले वैदेशिक रोजगारमा रहेका नेपाली श्रमिकलाई एकपछि अर्को गर्दै आकर्षित गर्न प्रयास गरिरहेको छ ।
आगामी आर्थिक वर्ष २०७९।८० को लागी सार्वजनिक गरिएको सरकारको आय व्यय विवरण तथा कार्यक्रममा समेत वैदेशिक रोजगारमा रहेका नेपाली श्रमिकलाई थप सुविधाको घोषणा गरिएको छ । रेमिट्यान्स पठाउनेलाई पासर्पोट, श्रम स्वीकृति नविकरण र कन्सुलर सेवाशुल्कमा ५० प्रतिशत छुट सुविधाको घोषणा गरिएको छ ।
यसअघि विप्रेषण आप्रवाहमार्फत् प्राप्त हुने रकम बैंक तथा वित्तीय संस्थाको बचत खातामा जम्मा गर्दा अन्य बचतकर्ताभन्दा थप एक प्रतिशत ब्याज दिने प्रावधान नेपाल सरकारले नेपाल राष्ट्र बैंकमार्फत् लागू गरिसकेको छ । यसले स्वदेशमा रहेका आफन्तलाई वैधानिक माध्यमबाट रकम पठाउनको लागी वैदेशिक रोजगारमा रहेका नेपाली श्रमिकलाई प्रेरित गरेको छ ।
यद्दपि केही बैंकका कर्मचारीको सुझावमा नेपालभित्रै भएको आम्दानी समेत विदेशबाट प्राप्त रेमिटेन्स हो भन्ने स्वघोषणामार्फत् बैंकरले अतिरिक्त ब्याज दिएर मुद्दती निक्षेप रोक्ने प्रयास गरिरहेको गुनासो भने सुनिएको छ ।
यसबाहेक विदेशमा रहेका नेपालीले नेपालको कुनै पनि वाणिज्य बैंकमा डलर खाता खोल्न पाउने सुविधा समेत दिइएको छ । डलर खातामा रकम जम्मा गर्ने र आफूलाई आवश्यक परेका बेला राष्ट्र बैंकको स्वीकृतिमा वैधानिक माध्मममार्फत् फिर्ता लैजान सकिने सुविधा दिइएको छ ।
