काठमाडौं। अन्तर्राष्ट्रिय मुद्रा कोषले चालू आर्थिक वर्षमा नेपालको आर्थिक वृद्धिदर १.८ प्रतिशतमा सीमित हुने पूर्वानुमान गरेको छ। विश्वको आर्थिक अवस्थाबारे ‘वर्ल्ड इकोनोमिक्स आउटलुक’ प्रतिवेदन सार्वजनिक गर्दै कोषले यस्तो पूर्वानुमान गरेको हो।
नेपालको कूल गार्हस्थ उत्पादन आउँदो आर्थिक वर्षमा ४.४ प्रतिशत हुने अपेक्षा गरिएको छ। यसअघि विश्व बैंकले गत साता सार्वजनिक गरेको आर्थिक स्थितिबारे सर्वेक्षण प्रतिवेदनमा पनि १.८ प्रतिशतकै वृद्धि दर रहने अनुमान गरिएको थियो। कोषले दक्षिण एशियाली मुलुकमध्ये भारतको आर्थिक वृद्धिदर सबैभन्दा राम्रो हुने पूर्वानुमान गरेको छ। भारतको आर्थिक वृद्धिदर ९.५ प्रतिशत रहने अनुमान गरिएको छ।
यो पूर्वानुमान यस आर्थिक वर्षको विश्व बैंकको ८.३ प्रतिशतको अनुमान भन्दा एक प्रतिशत बढी हो। कोषको प्रतिवेदनका अनुसार यो वर्ष चीनको कूल गार्हस्थ उत्पादनमा ८ प्रतिशत र आगामी वर्ष ५.६ प्रतिशतले वृद्धि हुनेछ। भारतबाहेक दक्षिण एशियाको अन्य मुलुकमा , वृद्धि दर कम रहने अपेक्षा गरिएको छ। कोषका अनुसार पाकिस्तानको जीडीपी यस वर्ष ३.९ प्रतिशत, अर्को वर्ष ४ प्रतिशत रहने अनुमान छ। त्यसैगरी बंगलादेशको ४.६ प्रतिशत र अर्को वर्ष .5 ६.५ प्रतिशत वृद्धि हुने अनुमान छ।श्रीलंकाको वृद्धि यस वर्ष ३.६ र अर्को वर्ष मध्यम ३.३ प्रतिशत हुने प्रक्षेपण गरिएको छ। भुटानको अर्थतन्त्र यस वर्ष १.९ प्रतिशतले संकुचित हुने अनुमान गरिएको छ, तर अर्को वर्ष ४.२ प्रतिशतले बढ्ने छ।
माल्दिभ्स, जसको अर्थतन्त्र गतवर्ष ३२ प्रतिशतले संकुचित भएको थियो, यो वर्ष १८.९ प्रतिशतले बढ्ने र अर्को वर्ष १३.२ प्रतिशतसम्म पुग्न सक्ने अनुमान छ। वैश्विक अर्थतन्त्र २०२१ मा ५.९ प्रतिशत र २०२२ मा ४.९ प्रतिशतले वृद्धि हुने प्रक्षेपण गरिएको छ – जुन जुलाईको पूर्वानुमानको तुलनामा २०२१ को ०.१ प्रतिशत बिन्दुले न्यून हो।
