काठमाडौं। अमेरिकाको लस एन्जलसको जंगलमा लागेको भीषण डढेलोका कारण अहिलेसम्म ५ जनाको मृत्यु भएको छ। लस एन्जलस सेरिफको कार्यालयले यसको पुष्टि गरेको हो।
वनमा लागेको डढेलोका कारण थप ३ जनाको मृत्यु भएको कार्यालयले जनाएको छ। यसअघि अधिकारीहरुले २ जनाको मृत्यु भएको पुष्टि गरेका थिए। यी दुवैको मृत्यु अल्टाडेना क्षेत्रको इटनमा भएको डढेलोका कारण भएको हो।
लस एन्जलस काउन्टी फायर चिफ एन्थोनी मारोनका अनुसार इटनको डढेलो अहिले १० हजार ६०० एकडमा फैलिसकेको छ र नियन्त्रणमा आउन सकेको छैन। ‘दुर्भाग्यवश पाँच नागरिकको मृत्यु भएको छ र केही घाइते भएका छन्। हालसम्म १ हजारभन्दा बढी घर वा भवन क्षतिग्रस्त वा पूर्ण रुपमा ध्वस्त भएका छन्’, उनले भने।
एन्थोनी मारोनका अनुसार क्यालिफोर्नियालगायत एरिजोना बाहिरका अधिकारीहरु पनि अग्निनियन्त्रकलाई मद्दत गर्न आएका छन्। लस एन्जलसको जंगलमा लागेको डढेलो लगातार फैलिरहेको छ। डढेलो फैलिन सक्ने खतरालाई मध्यनजर गर्दै यहाँ आपतकाल घोषणा गरिएको छ र सर्वसाधारणलाई चेतावनी दिइएको छ।
