काठमाडौं । निर्जीवन बीमा कम्पनीहरुले चालु आर्थिक वर्षको कात्तिकसम्म १४ अर्ब ३५ करोड रुपैयाँ बढीको व्यापार गरेका छन्।
नेपाल बीमा प्राधिकरणको तथ्यांकअनुसार साउनदेखि कात्तिकसम्मको ४ महिनाको अवधिमा १४ वटा निर्जीवन बीमा कम्पनी र ४ वटा निर्जीवन लघु बीमा कम्पनीहरुले १४ अर्ब ३५ करोड ८६ लाख रुपैयाँ कुल बीमाशुल्क आर्जन गरेका हुन्। यो अवधिसम्म कम्पनीहरुले मोटर बीमाको सर्वाधिक व्यापार गरेका छन्। मोटर बीमामा कम्पनीले ४ महिनामा ४ अर्ब ५९ करोड ३८ लाख रुपैयाँको कुल बीमाशुल्क आर्जन गरेका छन्।
यसैगरी दोस्रो सर्वाधिक धेरै व्यापार कम्पनीहरुको सम्पत्तितर्फ देखिएको छ। सम्पत्ति बीमामार्फत कम्पनीहरुले ३ अर्ब ८४ करोड २८ लाख रुपैयाँ कुल बीमाशुल्क संकलन गरेका छन्।
चार महिनामा इन्जिनियरिङ र ठेक्कातर्फ १ अर्ब ८३ करोड ४९ लाख रुपैयाँ, विविधतर्फ कम्पनीहरुले १ अर्ब ६५ करोड ८९ लाख रुपैयाँ, सामुद्रिकतर्फ ८१ करोड ७७ लाख रुपैयाँ, कृषि तथा बालीतर्फ ६७ करोड ७९ लाख रुपैयाँ, हवाईतर्फ ६६ करोड ४० लाख रुपैयाँ र लघुतर्फ २६ करोड ८३ लाख रुपैयाँ कुल बीमाशुल्क आर्जन गरेका छन्।
