काठमाडौं । राष्ट्रिय विपद् न्युनीकरण तथा व्यवस्थापन प्राधिकरणका अनुसार शुक्रबार अपरान्हदेखि उपत्यकामा शुरू भएको निरन्तर झरीले धनजनको ठूलो क्षति भएको छ।
प्राधिकरणका अनुसार शनिबार साँझसम्ममा ८६ जनाभन्दा बढीले ज्यान गुमाएका छन् । यीमध्ये काठमाडाैं उपत्यकामा ३४ जना, काभ्रेमा १४ जना, धादिङमा १५ जना, मकवानपुरमा ५ जना, सिन्धुपालचोकमा दुई र दोलखामा दुई ज्यान गएको छ।
उपत्यकाका तीन जिल्ला काठमाडौं, भक्तपुर र ललितपुरमा कूल ३४ जनाको ज्यान गएको छ। काठमाडौंमा ११, भक्तपुरमा पाँच, ललितपुरमा १८ ज्यान गएको छ। उपत्यकामा उद्धार गरिएकामध्ये १५ जना घाइते भएका छन् । सुरक्षाकर्मीले ४८१ जनाको उद्धार गर्न सफल भएका छन् । वर्षासँगै उपत्यकाका खोलामा आएको बाढीमा २१ जना हराइरहेका उपत्यका प्रहरी कार्यालयले जनाएको छ ।
काठमाडौंको नागढुंगादेखि मुनि झ्याप्लेखोलामा पहिरोमा पुरिएको दुईवटा यात्रुबाहक बसबाट १४ जनाको शव बरामद भएको छ। धादिङ जिल्लाको झ्याप्लेखोलामा पहिरोमा पुरिएको लु १ ज ४५७८ नम्बरको माइक्रो बसबाट ५ वटा शव र नम्बर नखुलेको अर्को एक यात्रु बाहक बसबाट थप ९ जनाको शव झिकिएको जिल्ला प्रहरी कार्यालय धादिङले जानकारी दिएको छ।
बागमती, विष्णुमती, बल्खु, कर्मनाशा, नख्खु लगायतका उपत्यकाभित्र बग्ने साना ठूला सबै नदीमा आएको बाढीले छेउछाउका सडक र पुलमा क्षति पुगेको छ। नदी आसपासको ग्यारेज, गोदाम, तरकारी बजार, हाउजिङ कोलोनीहरू डुबाएको छ।
उपत्यकाभित्रको अधिकांश जलवायू मापन केन्द्रका रेकर्ड ब्रेकः
जल तथा माैसम विज्ञान विभागका अनुसार शुक्रबार र शनिबार वर्षाका क्रममा केही जलवायू मापन केन्द्रमा वर्षाको नयाँ रेकर्ड गरिएको छ। विभागका अनुसार ललितपुरको चापागाउँमा २४ घण्टा अवधिमा ३२३ मिलिमिटर वर्षा मापन गरिएको छ । यसअघि सन् २००२ मा त्यहाँ एकैदिन २०० मिलिमिटर वर्षा मापन गरिएको थियो ।
पानीपोखरीमा ५३ वर्ष पुरानो रेकर्ड तोड्दै २२५.२ मिलिमिटर वर्षा भएको छ। यसअघि पानीपोखरीमा सन् १९७१ मा १९८ मिलिमिटर वर्षा रेकर्ड भएको थियो ।
बूढानीलकण्ठ, नागार्जुन, चाँगुनारायण, त्रिभूवन अन्तर्राष्ट्रिय विमानस्थल जलवायू मापन केन्द्रमा पनि वर्षाको पुरानो रेकर्ड तोडिएको छ ।
नोटः शनिबार राति ८ः५४ बजे अध्यावधिक गरिएको छ।
