काठमाडौं । इन्फोडेभलपर्स प्रा.लि. एक प्रमुख सफ्टवेयर कम्पनी, र आदिम कलेजबीच उद्योग-शिक्षा सहकार्यलाई प्रवर्द्धन गर्ने सम्झौतामा हस्ताक्षर भएको छ। यस सम्झौताले विद्यार्थीहरूको शैक्षिक र व्यावसायिक अवसरहरूलाई वृद्धि गर्ने उद्देश्य लिएको छ।
सम्झौता अनुसार, आदिम कलेजका विद्यार्थीहरूले इन्फोडेभलपर्समा इन्टर्नशिप, जागिरका अवसरहरू, र व्यावसायिक विकासका कार्यक्रमहरूमा सहभागिता जनाउन पाउनेछन्। यसका साथै, कार्यशाला, सेमिनार, र विभिन्न सम्मेलनहरू समेत आयोजना गरिनेछ।
सम्झौतामा आदिम कलेजका सीईओ शंकर प्रसाद शर्मा र इन्फोडेभलपर्सका एचआर प्रबन्धक प्रयास राजोपाध्यायले हस्ताक्षर गरेका छन्। यस अवसरमा इन्फोडेभलपर्सका मार्केटिङ प्रमुख रेशम भण्डारी र वन कभर प्रा.लि.का सीईओ चिरञ्जीवी अधिकारीको समेत उपस्थिति रहेको थियो।
सम्झौताले विद्यार्थीहरूलाई एआई, क्लाउड कम्प्युटिङ, साइबर सुरक्षा, र सफ्टवेयर विकास जस्ता विषयहरूमा व्यावहारिक अनुभव र ज्ञान प्रदान गर्नेछ।
आदिम कलेजका सीईओ शंकर प्रसाद शर्माले यस सम्झौताले विद्यार्थीहरूलाई उद्योगसँग जोड्न र उनीहरूको करियरलाई अघि बढाउन ठूलो योगदान पुर्याउने बताए।
इन्फोडेभलपर्सका एचआर प्रबन्धक प्रयास राजोपाध्यायले भने, ‘विद्यार्थीहरूको क्षमता वृद्धि गर्न र उनीहरूलाई उद्योगसँग परिचित गराउन हामी प्रतिबद्ध छौं।’
यो सहकार्यले विद्यार्थीहरूलाई नयाँ ज्ञान, सीप, र अवसरहरू प्रदान गर्दै उनीहरूको उज्जवल भविष्य निर्माणमा सहयोग गर्ने अपेक्षा गरिएको छ।
