काठमाडौं । जब हामी विश्वका सबैभन्दा धनी व्यक्तिहरुका बारेमा कुरा गर्छौं तब एलन मस्क, जेफ बोजेस, मार्क जुकरबर्गलगायतको नाम आउँछ। उनीहरु विश्वकै धनी व्यक्तिमा पर्छन् भन्ने कुरामा कुनै शंका छैन। तर, यी सबै पुरुष हुन्।
तपाइँलाई थाहा छ संसारकै धनी महिला को हुन् ? यी महिलाको नाम एलिस वाल्टन हो। ७४ वर्षीया एलिस एक ठूलो अमेरिकी व्यवसायी महिला हुन्। उनी वालमार्टका संस्थापक साम वाल्टनकी छोरी हुन्। ब्लुमबर्ग बिलियनेर्स इन्डेक्सका अनुसार उनी विश्वकै धनी महिला हुन् र सबै धनी व्यक्तिहरुमध्ये १८ औँ स्थानमा छिन्।
एलिस वाल्टनको कुल सम्पत्ति ९५.१ अर्ब डलर रहेको छ। उनका भाइ रोब वाल्टन र जिम वाल्टन सम्पत्तिको हिसाबले अगाडि छन्।
वालमार्टको उत्तराधिकारीका रुपमा एलिस वाल्टनको नाम आइरहेको छ। वालमार्ट अमेरिकाको सबैभन्दा ठूलो ई–कमर्स कम्पनी हो। यो कम्पनीले भारतको फ्लिपकार्टको शेयर किनेको थियो।
ब्लुमबर्ग बिलियनेर्स इन्डेक्सका अनुसार एलिस लोरियल उत्तराधिकारी फ्रान्कोइस बेटेनकोर्ट मेयर्सलाई पछि पार्दै विश्वको सबैभन्दा धनी महिला बनेकी छन्। एलिसको सम्पत्ति बढ्नुको सबैभन्दा ठूलो कारण वालमार्टको शेयरमा भएको वृद्धि हो। वालमार्टको शेयरमूल्य १ वर्षमा ४४ प्रतिशतले बढेको छ। यो वृद्धिसँगै यसको मूल्य रेकर्ड उच्च पुगेको छ। जसका कारण वाल्टनको सम्पत्ति २५ अर्ब डलरले बढेको छ।
लोरियलका संस्थापक युजीन शुलरकी नातिनी फ्रान्कोइस बेटेनकोर्ट मेयर्स विश्वकै धनी महिलाको सूचीमा शीर्ष स्थानबाट झरेका छन्। यो वर्ष उनको सम्पत्ति १० अर्ब डलरले घटेको छ। यो गिरावटका कारण उनीहरुको सम्पत्ति ९० अर्ब डलरमा झरेको छ। लोओरियलको शेयर जनवरीदेखि १३ प्रतिशतले घटेको छ। –एजेन्सी
