काठमाडौं । अटोमेटिक कारहरु अहिले विश्वभर लोकप्रिय भइसकेका छन्। तर, म्यानुअल गियरबक्स कारहरुको संख्या पनि अझै धेरै नै छ।
म्यानुअल गियरबक्स कार चलाउँदा धेरैजसोले यस्ता गल्तीहरु गर्छन्, जसले कार र चालक दुवैलाई हानि पुर्याउँछ। यहाँ हामी यस्ता ५ ठूला गल्तीका बारेमा बताउन गइरहेका छौँ, जुन म्यानुअल गियरबक्स कार चलाउँदा कहिल्यै गर्नु हुँदैन।
गियर लिभरलाई आर्मरेस्ट नबनाऔँ
म्यानुअल गियर कार चलाउने अधिकांश मानिसहरुले एउटा हात स्टेयरिङ ह्विलमा र अर्को हात गियर लिभरमा राख्छन्। हात आरामका लागि गियर लिभर प्रयोग गर्नु हुँदैन। वास्तवमा म्यानुअल ट्रान्समिसनको समयमा हामीले गियर लिभरमात्र देख्छौँ तर यसको पछाडिको कार्यहरु देखिँदैन। गियर लिभरका साथ गियर चेन्ज गर्दा स्थिर रहने सेलेक्टर फोर्कले रोटेटिङ कलरमा दबाब दिन्छ र कलरले गियरलाई चालकले ड्राइभ गर्न चाहेको स्थितिमा दबाब दिन्छ। गियर लिभरमा आफ्नो हात राख्दा सेलेक्टर फोर्क रोटेटिङ कलरको सम्पर्कमा आउन सक्छ र गियर सिफ्ट हुने जोखिम हुन्छ। यस कारणले गर्दा कार चलाउँदा स्टेयरिङ ह्विलमा हात राख्नुपर्छ। यसो गरेमा चालक र कार दुवै सुरक्षित रहनेछन्।
खुट्टा सधैँ क्लच पेडलमा नराखौँ
कारको क्लच पेडलमा आफ्नो खुट्टा आराम नगर्नुहोस्। यसो गर्नाले इन्धन खपत बढ्छ। किनकि यस्तो अवस्थामा प्रसारण उर्जा गुम्ने सम्भावना हुन्छ। साथै, यदि अचानक ब्रेक लगाउन आवश्यक छ भने हतारमा ब्रेकको सट्टा क्लच थिचिन्छ। यसले दुर्घटना निम्त्याउन सक्छ। त्यस कारण क्लच पेडलको नजिक रहेको डेड पेडल प्रयोग गर्नु राम्रो हुन्छ र सामान्यतया आजकल हरेक कारमा पाइन्छ।
स्टप सिग्नलमा कारलाई गियरमा नराखौँ
यदि स्टप सिग्नलमा इन्जिन रोक्न नचाहेमा कारलाई न्युट्रलमा राख्नु उत्तम विकल्प हुनेछ। यदिस्टप सिग्नलमा कार गियरमा राखेमा सिग्नल हरियो हुनु अघि खुट्टा क्लचबाट चिप्लिने सम्भावना हुन्छ। यस्तो अवस्थामा कार आफैँ अगाडि बढ्छ र दुर्घटना हुन सक्छ।
स्पिड बढाउँदा गलत गियर प्रयोग नगरौँ
स्पिड बढाउँदा गतिअनुसार गियर चयन गर्नुपर्छ। कम गियरमा बढी स्पीड राख्दा इन्जिनमा दबाब पर्छ र आवाज आउन थाल्छ। यसले इन्धन बढी खपत हुनेछ। इन्जिन छिट्टै बिग्रने सम्भावना पनि उत्तिकै हुन्छ। कारको गियरहरु सधैँ उचित इन्जिन आरपीएम (रिभोलुसन प्रतिमिनेट) मा परिवर्तन गर्नुपर्छ। एक्सेलेटरलाई सोही अनुसार थिच्नुपर्छ।
कच्ची र उकालो सडकमा क्लच पेडल नथिचौँ
सामान्यतया मानिसहरुले कच्ची र उकालो सडकमा कार चलाउँदा क्लच थिच्ने गर्छन्, जुन गलत हो। यसो गर्दा कार गियरलेस हुन्छ। यस्तो अवस्थामा क्लच थिचेर राखेमा कच्ची सडकमा रोकिँदा कार पछाडि जान थाल्छ। कच्ची उकालो सडक चढ्दा कारलाई गियरमा राख्नुपर्छ र गियर परिवर्तन गर्दामात्र क्लच प्रयोग गर्नुपर्छ। यसलाई लगातार थिच्नु हुँदैन।
