काठमाडौं । दक्षिण एशियाली मुलुक बंगलादेशमा सत्ता विरूद्ध भएको आन्दोलनमा सरकारी दमन र झपका कारण जुलाइ १६ यता ४४० जनाको ज्यान गएको छ। स्थानीय अखबार प्रथम आलोका अनुसार पछिल्लो पटक सोमबार राजधानी ढाका र आसपासको क्षेत्रमा भएको हिंसात्मक झडप र सुरक्षाकर्मीको गोली प्रहारबाट १०९ जनाको मृत्यु भएको छ।
जुलाइ १६ देखि शुरू भएको पहिलो चरणको प्रदर्शनमा २०० जनाको ज्यान गएको थियो । सरकारले बंगलादेश स्वतन्त्रता आन्दोलन सेनानीको परिवारजनलाइ सरकारी जागिरमा ५६ प्रतिशतसम्म आरक्षणको घोषणा गरेपछि त्यहाँ शान्तिपूर्ण प्रदर्शन शुरू भएको थियो। प्रदर्शनमा सत्तारूढ दल र सरकारी सुरक्षाकर्मीले दमन शुरू गरेपछि हिंसामा परिणत भएको थियो । सरकारी आरक्षणको घोषणामा जुलाइ २२ मा सर्वोच्च अदालतले रोक लगाएपछि आन्दोलन मत्थर भएकोमा पुनः गत आइतबारबाट विरोध प्रदर्शन शुरू भएको थियो ।
अखबारका अनुसार सोमबार दिनभर विभिन्न स्थानमा भएको झडपका क्रममा मारिनेमा उपजिल्ला परिषदका अध्यक्ष, दुई जना संघ परिषद्का अध्यक्ष र सुरक्षाकर्मी सहित १०९ जना रहेका छन् । प्रधानमन्त्री शेख हसिनाको राजीनामा माग्दै विद्यार्थी र आम नागरिकले ‘मार्च टु ढाका’ कार्यक्रमलाई केन्द्रमा राखेर सोमबार दिउँसो राजधानीको जात्राबारीको काजला क्षेत्रमा प्रदर्शन गरि रहेका थिए । प्रदर्शनका क्रममा शान्ति सुरक्षा बलका सदस्यहरूले उनीहरूमाथि अन्धाधुन्ध गोली बर्साउँदा, धेरै जना प्रदर्शनकारी मारिए । ढाका मेडिकल अस्पताल स्रोतका अनुसार गोली लागेर मृत्यु भएका ३० जनालाई जात्राबारी क्षेत्रबाट अस्पताल लगिएको थियो ।
विभेद विरुद्धको विद्यार्थी आन्दोलनको एकबुँदे माग पूरा गर्ने अन्तिम घडीमा आइतबार राजधानी ढाकासहित देशका विभिन्न भागमा भएको झडपमा कम्तीमा १०९ जनाको मृत्यु भएको थियो । यसअघि गत आइतबार राति १२ बजेसम्म ९८ जनाको मृत्यु भएकोमा मध्यरातमा थप १६ जनाको मृत्यु भएसँगै आइतबार कूल मृतकको संख्या ११४ पुगेको प्रथम आलोले उल्लेख गरेको छ।
