काठमाडौं । लिबर्टी माइक्रो लाइफ इन्स्योरेन्सले मृत्यु दाबी भुक्तानी गरको छ । कम्पनीले बर्दिबास १२ स्थित बिजलपुराकी ६४ वर्षीय मृतक रामरतीदेवी सदाको परिवारलाई बीमा दाबी वापतको रकम १ लाख रुपैयाँ भुक्तानी गरेको हो । ज्वरोले ग्रस्त भई रामरतीदेवी सदाको असार २ गते मृत्यु भएको थियो ।
उक्त दाबी वापतको रकम नगरपालिकाकी उपप्रमुख तारादेवी महतो, १२ र १४ नं का वडाध्यक्षहरू रामकिशोर साह तथा विजय महतो र लिवर्टी माइक्रो लाइफ इन्स्योरेन्सका महोत्तरी प्रमुख रवीन्द्र मिश्रले बुधबार मुसहर बस्तीमै पुगेर हस्तान्तरण गरेको हो ।
यो परिवार बीमा रकम पाउने मुलुककै पहिलो मुसहर समुदाय भएको दाबी गरिएको छ । सीमान्तकृत जातीमा पर्ने मुसहर समुदायको सुरक्षित भविष्य र सर्वाङ्गीण हितका लागि नगरपालिकाले बर्दिबास १०, १२ र १४ नं वडामा बसोबास गर्ने १८ देखि ६९ वर्ष उमेर समूहका ४५० जना मुसहरको प्रति व्यक्ति १ लाखका दरले वैशाख महिनामा लिबर्टी माइक्रो लाइफले ‘सामूहिक म्यादी लघु जीवन बीमा’ गरेको थियो । सोही स्किम बापत मृतक परिवारले पहिलोपटक बीमा रकम पाएको नगरप्रमुख प्रह्लाद क्षेत्रीले बताए ।
बीमा रकम पाएपछि मृतक परिवारले राहत महसुस गरेको जनाइएको छ । मृतकका श्रीमान् परीक्षण सदाले काजक्रियामा लागेको २५ हजार जति ऋण तिर्न सहज भएको बताए । बाँकी रहेको रकमले औषधीमूलो गर्न र परिआएको बेलामा कसैसँग हात पसार्नु पर्ने स्थिति अन्त्य भएको बताइएको छ ।
