काठमाडौं । बैंकिङ प्रणालीमा निक्षेप थपिने क्रम जारी नै रहेको छ। बैंकिङ प्रणाली निक्षेप थुप्रिए साढे ६३ खर्ब पुग्न लागेको छ।
नेपाल राष्ट्र बैंक तथ्यांकअनुसार असार १७ गते बैंकिङ प्रणालीमा एकैदिन १० अर्ब रुपैयाँले निक्षेप बढेको छ। योसँगै बैंक तथा वित्तीय संस्थाको कुल निक्षेप ६३ खर्ब ४५ अर्ब रुपैयाँ पुगेको छ। अघिल्लो दिन असार १६ गतेसम्म बैंक तथा वित्तीय संस्थाको कुल निक्षेप ६३ खर्ब ३५ अर्ब रुपैयाँ थियो।
असार १७ मा वाणिज्य बैंकहरुको निक्षेप पनि ९ अर्ब रुपैयाँले बढेर ५६ खर्ब २२ अर्ब रुपैयाँ पुगेको छ। अघिल्लो दिनसम्म वाणिज्य बैंकहरुको कुल निक्षेप ५६ खर्ब १३ अर्ब रुपैयाँ थियो।
निक्षेप बढेको बढ्यै गरे पनि कर्जा प्रवाहले भने गति लिन सकेको छैन। असार १७ मा बैंक तथा वित्तीय संस्थाको कुल कर्जा लगानी २ अर्ब रुपैयाँले मात्रै बढेर ५१ खर्ब ५१ अर्ब रुपैयाँ पुगेको छ। अघिल्लो दिनसम्म कुल कर्जा लगानी ५१ खर्ब ४९ अर्ब रुपैयाँ थियो।
निक्षेप थुप्रिएसँगै बैंकहरुको औसत सीडी रेसियो ८० प्रतिशत तल झरेको छ। असार १७ मा बैंकहरुको औसत सीडी रेसियो ७९.०९ प्रतिशत रहेको छ। अन्तरबैंक ब्याजदर भने ३ प्रतिशत रहेको छ।
