काठमाडौं । लघु बीमा भनेको आर्थिक रुपमा पिछडिएका विपन्न तथा न्युन आय भएका सीमान्तकृत समुदायका लागि गरिने बीमा नै लघुबीमा हो । लघुबीमाले न्युन आय भएका समुदायलाई बीमाको दायरामा ल्याउने काम गर्दछ । कम बीमा शुल्कमा ग्राहकमैत्री बीमा सेवा प्रदान गर्नु नै लघुबीमाको विषेशतामध्ये एक हो । लघु बीमाले थोरै बीमाशुल्क जीवन, सम्पत्ती तथा दायित्व विरुद्ध जोखिम भारलाई कम गर्दछ ।
गाउँ गाउँमा गएर बीमाको पहुँच बृद्धि गर्न, पिछडिएका सबै समुदायलाई बीमाको पहुँचमा ल्याउनका लागि नै प्राधिरकणले लघुबीमा कम्पनीलाई लाइसेन्स वितरण गरेको हो । लघुबीमाले सरल र सहज सेवा दिने गर्दछ । बीमा प्रक्रियाहरु पनि लघुबीमा मार्फत सहज हुने गर्दछ । नेपालजस्तो विकासउन्मुख देशका लागि लघुबीमा धेरै नै उपयुक्त छ ।
यस्ता छन् लघुबीमाको महत्व
न्युन आय भएका तथा पिछडिएका सीमान्तकृत वर्गको जीवन तथा सम्पत्तीको जोखिम विरुद्ध आर्थिक सुरक्षा गर्दछ ।
बचत र वित्तीय सुरक्षाको आधारमा प्रदान गर्दछ ।
स्वास्थ्य, शिक्षा लगायतका आवश्यक सेवामा पहुँच विस्तार गर्न सहयोग हुन्छ ।
बाढी, पहिरो, प्राकृतिक प्रकोप, रोगव्याधिबाट जनधनमा हुने क्षतिको क्षतिपुर्ति गर्दा सरकारले व्यहोर्नुपर्ने आर्थिक भारलाई न्युनिकरण गर्दछ ।
साना व्यापार तथा व्यवसाय निरन्तरताको लागि आधार प्रदान गर्दछ ।
लघुबीमा कम्पनीहरुले प्रयोगमा ल्याएका डिजिटल एप बाट बीमा सम्बन्धी सम्पुर्ण कार्य गर्न सकिने हुन्छ ।
बीमाको दायरा विस्तार गरी बीमामा समावेशिता कायम गराउँदछ ।
