काठमाडौं । इन्धनको मूल्य घटेको छ। भारतले मूल्य घटाएर पठाएसँगै नेपालमा पनि इन्धनको मूल्य घटेको हो।
नेपाल आयल निगमले पेट्रोल, डिजल र मट्टीतेलको मूल्य घटाएको हो। निगम सञ्चालक समितिको शनिबार बैठकले पेट्रोलमा प्रतिलिटर ३ रुपैयाँ तथा डिजेल र मट्टीतेलमा प्रतिलिटर १ रुपैयाँ घटाएको हो। यो घटेको मूल्य शनिबार राति १२ बजेदेखि लागू हुने निगमले जनाएको छ।
अब काठमाडौं, पोखरा र दिपायल वरपर पेट्रोलको मूल्य प्रतिलिटर १६५ कायम भएको छ। त्यस्तै सुर्खेत र दाङ वरपर प्रतिलिटर १६४, चारआली, विराटनगर, जनकपुर, अमलेखगन्ज, भलबारी, नेपालगन्ज, धनगढी र वीरगन्ज आसपास प्रतिलिटर १६२ कायम भएको छ।
यसैगरी डिजेल र मट्टीतेलमा काठमाडौं, पोखरा र दिपायल वरपर प्रतिलिटर १५२, सुर्खेत र दाङ वरपर १५१ र चारआली, विराटनगर, जनकपुर, अमलेखगन्ज, भलबारी, नेपालगन्ज, धनगढी र वीरगन्ज आसपास १४९ रुपैयाँ कायम भएको छ।
