काठमाडौं । नेपालमा संचालित १४ जीवन बीमा कम्पनीहरुले चालु आर्थिक वर्षको ९ महिनामा ८ अर्ब ९४ करोड २ लाख अभिकर्ता कमिशन शीर्षकमा खर्च गरेका छन् । गत आर्थिक वर्षको ९ महिनामा ८ अर्ब ८० करोड ४८ लाख अभिकर्ता कमिशन शीर्षकमा जीवन बीमा कम्पनीहरुले खर्च गरेका थिए ।
जीवन बीमा कम्पनीमध्ये नेपाल लाइफ इन्स्योरेन्सले सर्वाधिक सो शीर्षकमा खर्च गरेको छ । नेपाल लाइफबाट अभिकर्ताले ९ महिनामा २ अर्ब १९ करोड २४ लाख प्राप्त गरेका छन् । यो रकम गत आर्थिक वर्षको सोही अवधिको तुलनामा १ दशमलव ८८ प्रतिशतले कम हो । गत वर्ष नेपाल लाइफबाट अभिकर्ताले २ अर्ब २३ करोड ४३ लाख प्राप्त गरेका थिए ।
त्यस्तै दोश्रोमा नेशनल लाइफबाट अभिकर्ताले १ अर्ब १६ करोड १५ लाख प्राप्त गरेका छन् । गत वर्ष यसै अवधिमा सो कम्पनीबाट अभिकर्ताले १ अर्ब ८ करोड ८६ लाख प्राप्त गरेकोमा समिक्षा अवधिमा ६ दशमलव ६९ प्रतिशतले वृद्धि भएको हो ।
गत आर्थिक वर्षको तेश्रो त्रैमास र अहिलेको तेश्रो त्रैमासलाई दाँजेर हेर्दा ६ कम्पनीको अभिकर्ता शीर्षक अन्तर्गत खर्च बढेको देखिएको छ भने ८ कम्पनीको घटेको देखिएको छ ।
