काठमाडौं । चालु आर्थिक वर्षको ९ महिना चैतसम्म ७ हजार बढी विद्युतीय सवारीसाधन (जिप, कार र भ्यान) नेपाल भित्रिएका छन्।
भन्सार विभागको तथ्यांकअनुसार चालु आर्थिक वर्षको ९ महिना चैतसम्म ७ हजार ९३ वटा विद्युतीय सवारीसाधन भित्रिएका हुन्। यो संख्या हालसम्मकै उच्च हो। अघिल्लो वर्ष यही अवधिसम्म २ हजार ४५८ वटा विद्युतीय सवारीसाधन भित्रिएका थिए।
यो ९ महिनामा विद्युतीय सवारीसाधन भित्रिँदा नेपालबाट १७ अर्ब ४९ करोड ४९ लाख रुपैयाँ बाहिरिएको छ। यो अवधिमा सरकारले आयातित विद्युतीय सवारीसाधनबाट ८ अर्ब १७ करोड ३८ लाख रुपैयाँ राजस्व संकलन गरेको छ।
विभागअनुसार चैतसम्म नेपालमा ५० किलोवाट क्षमताको २ हजार ९०२ वटा विद्युतीय गाडी भित्रिएका छन्। यसका लागि ५ अर्ब ४० करोड २९ लाख रुपैयाँ बाहिरिएको छ भने सरकारले १ अर्ब ६१ करोड १२ लाख रुपैयाँ राजस्व प्राप्त गरेको छ।
यसैगरी यो ९ महिनामा नेपालमा ५१ किलोवाटदेखि १०० किलोवाटसम्मको ४ हजार ७७ वटा विद्युतीय गाडी आयात भएको छ। यी गाडीका लागि ११ अर्ब ४६ करोड ९८ लाख रुपैयाँ बाहिरिएको छ भने सरकारले ५ अर्ब ६२ करोड १२ लाख रुपैयाँ राजस्व प्राप्त भएको छ।
चैतसम्म नेपालमा १०१ किलोवाटदेखि २०० किलोवाटसम्मको ४६ करोड ८८ लाख रुपैयाँमा ९३ वटा र २०१ किलोवाटदेखि ३०० किलोवाटसम्मको १५ करोड ३२ लाख रुपैयाँमा २१ वटा विद्युतीय गाडी आयात भएका छन्। यी क्षमताका आयातित गाडीबाट सरकारले क्रमशः ३२ करोड ६८ लाख रुपैयाँ र २१ करोड ५८ लाख रुपैयाँ राजस्व पाएको छ।
विभागका तथ्यांकअनुसार नेपालमा सबैभन्दा बढी विद्युतीय गाडी चीनबाट आयात हुने गरेको छ। त्यसपछि भारत, दक्षिण कोरिया, इन्डोनेसियाबाट जर्मनी र अमेरिकाबाट विद्युतीय सवारीसाधन आयात भएको विभागको तथ्यांकमा उल्लेख छ।
