काठमाडौं । चालु आर्थिक वर्ष २०८०÷८१ को दोस्रो त्रैमास (पुस महिना)सम्म नेपाललाई २२ अर्ब ३३ करोड रुपैयाँबराबर प्रत्यक्ष वैदेशिक लगानी प्रतिबद्धता प्राप्त भएको छ।
उद्योग विभागका अनुसार पुस मसान्तसम्म कुल २२६ उद्योग तथा प्रतिष्ठान स्थापनाका लागि कुल २२ अर्ब ३३ करोड ६५ लाख रुपैयाँबराबर वैदेशिक लगानी प्रतिबद्धता प्राप्त भएको हो। पुसमा मात्र २७ प्रस्ताव प्राप्त भएको छ।
विभागका अनुसार यो ६ महिनामा सेयर पर्चेज एग्रिमेन्टमा २८ प्रस्ताव प्राप्त भएको छ। जसमा ४ अर्ब १ कराड रुपैयाँबराबर वैदेशिक लगानी प्रतिबद्धता प्राप्त भएको छ।
पुस मसान्तसम्म प्रविधि हस्तान्तरणका ३१ प्रस्ताव प्राप्त भएको विभागले जनाएको छ।
समीक्षा अवधिसम्म ती उद्योग तथा प्रतिष्ठानमा १२ हजार १६७ जनाले रोजगारी पाउने प्रतिबद्धता पनि आएको विभागले जनाएको छ।
विभागका अनुसार कुल प्रस्तावमध्ये साना उद्योगमा २११, मझौला उद्योगमा १२ र ठूला ३ उद्योगमा प्रत्यक्ष वैदेशिक लगानी प्रतिबद्धता प्राप्त भएको छ।
