काठमाडौं । चालू आर्थिक वर्ष २०८०/८१ को ५ महिना मंसिरसम्म नेपालमा १४ अर्ब १० करोड रुपैयाँ बढीको स्मार्टफोन आयात भएको छ।
भन्सार विभागको तथ्यांकअनुसार यो ५ महिनाको अवधिमा उक्त मूल्यबराबरको स्मार्टफोन आयात भएको हो। विदेशबाट १५ लाख सेट मोबाइल फोन आयात भएको विभागको तथ्यांकले देखाउँछ।
नेपालमा सबैभन्दा धेरै स्मार्टफोन चीनबाट भित्रिएको छ। यो ५ महिनामा चीनबाट १० अर्ब रुपैयाँबराबरको स्मार्टफोन आयात भएको विभागले जनाएको छ।
चीनपछि भारतबाट सबैभन्दा बढी स्मार्टफोन भित्रिएको छ। भारतबाट यो ५ महिनामा ३ अर्ब ९४ करोड रुपैयाँबराबरको स्मार्टफोन भित्रिएको छ।
विश्वका ४९ वटा देशबाट नेपालमा स्मार्टफोन आयात हुने गरेको तथ्यांकले देखाउँछ।
