काठमाडौं । पश्चिमी दिशाबाट नेपाल प्रवेश गरेको वायूको प्रभावले बुधबार देशका पहाडी भूभागका केही स्थानमा वर्षा र हिमाली क्षेत्रमा हिमपात हुने संभावना रहेको छ।मौसम पूर्वानुमान महाशाखाका अनुसार बिहान पहाडी भूभागमा आंशिकदेखि सामान्य बदली भई बाँकी भूभागमा आंशिक बदलीदेखि मौसम सामान्यत: सफा रहेको छ ।
तराईका थोरै स्थानमा हुस्सु तथा कुहिरो लागेको छ। दिउँसो कोशी, बागमती र गण्डकी प्रदेशका पहाडी भूभागका एक-दुई स्थानमा हल्का वर्षा हुने महाशाखाले अनुमान गरेको छ । कोशी, बागमती, गण्डकी र कर्णाली प्रदेशका उच्च पहाडी तथा हिमाली भूभागका एक-दुई स्थानमा हल्का हिमपातको सम्भावना पनि छ।
त्यसैगरी रातको समयमा कोशी, बागमती र गण्डकी प्रदेशका उच्च पहाडी तथा हिमाली भू्भागका एक-दुई स्थानमा हल्का हिमपातको सम्भावना रहेको महाशाखाले जनाएको छ । बिहीबार दिउँसो कोशी प्रदेशलगायत देशका पहाडी भू-भागमा आंशिक बदली भई बाँकी भूभागमा मौसम सामान्यत: सफा रहनेछ।
