काठमाण्डौ । भारतीय शेयर बजारले लगातार तेस्रो दिन बुधबार पनि नयाँ अल टाइम हाई बनाएको छ।
आज सेन्सेक्स बढेर ६९७४४.६२ को विन्दुमा बन्द भएको छ। निफ्टीले २०९६१.९५ को स्तरमा पुगेको छ। सेन्सेक्स र निफ्टीले नयाँ उचाइ बनाएको हो।
हिजो मंगलबार भारतीय शेयर बजारले नयाँ कीर्तिमान कायम गरेको थियो। सेन्सेक्स बढेर ६९२९६ को स्तरमा र निफ्टी २०८५५ को स्तरमा बन्द भएको थियो।
आज सेन्सेक्स ३५७ अंकले र निफ्टी ८२ अंकले बढेको छ। सेन्सेक्सका ३० स्टकमध्ये २० बढेका छन् र १० मात्र घटेका छन्। आज अटो र मेटलको शेयरभाउ उछाल आएको छ।
भारतीय शेयर बजारमा विदेशी संस्थागत लगानीकर्ता (एफआईआई)ले खरिददारी बढाउँदै गएका छन्। यो महिनामात्र ३ सेसनमा कुल भारु ८८ अर्ब ८८ करोड ३३ लाखको खरिद गरेका छन्।
मोर्गन स्टेनली इन्डियाका एमडी रिधम देसाईले आगामी ४ वर्षसम्म भारतीय शेयर बजार वार्षिक २० प्रतिशतले बढ्ने अनुमान गरिएको बताउँछन्। –एजेन्सीको सहयोगमा
