काठमाडौं । चालु आर्थिक वर्ष २०८०/८१ को चार महिना कात्तिकसम्म निर्जीवन बीमा कम्पनीहरुले लघुबीमा व्यवसायबाट करिब साढे २ करोड रुपैयाँ प्रिमियम संकलन गर्न सफल भएका छन्।
नेपाल बीमा प्राधिकरणको तथ्यांकअनुसार यो ४ महिनामा निर्जीवन बीमा कम्पनीहरुले १० हजार ५८८ लघु बीमालेख जारी गर्दै २ करोड ४१ लाख रुपैयाँ कुल बीमाशुल्क आर्जन गरेका हुन्। यो अवधिसम्म प्रोटेक्टिभ माइक्रो इन्स्योरेन्सले सर्वाधिक १ करोड ६ लाख रुपैयाँ लघुबीमा व्यवसायबाट कुल बीमाशुल्क आर्जन गरेको छ। प्रोटेक्टिभले यस अवधिसम्म २ हजार २४५ वटा लघुबीमा पोलिसी बेचेको छ।
यसैगरी दोस्रोमा नेपाल माइक्रो इन्स्योरेन्स रहेको छ। यो कम्पनीले कात्तिकसम्म ३ हजार ४०५ वटा पोलिसी बिक्री गरी कुल ६१ लाख ३१ हजार रुपैयाँ कुल बीमाशुल्क आर्जन गरेको छ।
नेको इन्स्योरेन्सले पनि कात्तिकसम्म २ हजार १९१ बीमालेख जारी गर्दै ४७ लाख ९९ हजार रुपैयाँ प्रिमियम कलेक्सन गरेको छ। यो अवधिसम्म लघुबीमा व्यवसायबाट प्रभु इन्स्योरेन्सले ८ लाख ५८ हजार रुपैयाँ, सिद्धार्थ प्रिमियरले ५ लाख ३ हजार रुपैयाँ, शिखर इन्स्योरेन्स ३ लाख ६२ हजार रुपैयाँ र सानिमा जीआईसीले ३ लाख ३८ हजार रुपैयाँ कुल बीमाशुल्क आर्जन गरेका छन्।
यसैगरी लघुबीमा व्यवसायबाट सगरमाथा लुम्बिनी इन्स्योरेन्सले २ करोड ६१ लाख रुपैयाँ, युनाइेट अजोड इन्स्योरेन्सले १ लाख ४२ हजार रुपैयाँ, हिमालयन एभरेस्टले ६४ हजार रुपैयाँ, ओरिएन्टलले ३० हजार रुपैयाँ र नेशनल इन्स्योरेन्सले १ हजार रुपैयाँ कुल बीमाशुल्क आर्जन गरेका छन्।
