काठमाडौं । नेपाल वायुसेवा निगम (नेपाल एयरलाइन्स)को हरेक आन्तरिक उडानमा अपांगता भएका दुईजना यात्रुले हवाई भाडामा ५० प्रतिशत छुट पाउने भएका छन्।
आज डिसेम्बर ३ अन्तर्राष्ट्रिय अपांगता दिवसका अवसर पारेर आजैदेखि लागू हुने गरी निगमले हरेक आन्तरिक उडानमा अपांगता भएका दुईजना यात्रुलाई हवाई भाडामा ५० प्रतिशत छुट दिने घोषणा गरेको हो।
रातो, निलो र पहेँलो वर्गका अपांगता परिचपत्र लिएका यात्रुहरुका लागि निगमको हरेक आन्तरिक उडानमा फर्ट कम फर्ट सर्भिस बेसिसका आधारमा यो छुट सुविधा दिइने निगमका प्रवक्ता रमेश पौडेलद्वारा जारी विज्ञप्तिमा उल्लेख छ।
उक्त सुविधाका लागि सम्बन्धित यात्रुले आफ्नो सक्कल परिचयपत्रसहित निगमको कार्यालयमा सम्पर्क राख्नुपर्ने निगमले जनाएको छ।
