काठमाडौं । चालु आर्थिक वर्षको चौथो महिना कात्तिकसम्म नेपालबाट भारततर्फ साढे १२ अर्ब रुपैयाँको विद्युत निर्यात भएको छ।
नेपाल विद्युत प्राधिकरणले सार्वजनिक गरेको तथ्यांकअनुसार चालु आर्थिक वर्षको साउनदेखि कात्तिकसम्म १ अर्ब ३६ करोड १२ लाख युनिट विद्युत निर्यात गरी १२ अर्ब ५० करोड ८ लाख रुपैयाँ कमाएको हो।
गत आर्थिक वर्षको कात्तिकसम्म प्राधिकरणले ९८ करोड ३८ लाख युनिट विद्युत निर्यात गरी ७ अर्ब ६३ करोड ६४ लाख रुपैयाँ आर्जन गरेको थियो । यो हिसाबले समीक्षा अवधिमा प्राधिकरणले अघिल्लो वर्षको तुलनामा ४ अर्ब ८६ करोड ४४ लाख रुपैयाँ बढीको विद्युत भारततर्फ निर्यात गरेको छ।
प्राधिकरणको तथ्यांकअनुसार गत साउनमा प्राधिकरण प्रतियुनिट औसत ८.३९ रुपैयाँमा, भदौमा ११.२४ रुपैयाँमा, असोजमा ९.७३ रुपैयाँ र कात्तिकमा ७.३६ रुपैयाँमा विद्युत निर्यात गरेको छ।
प्राधिकरणले देशभित्र खपत गरी बचेको विद्युत गत जेठ अन्तिम साताबाट भारतीय बजारमा बिक्री सुरु गरेको थियो ।
