काठमाडौं । सिटिजन लाइफ इन्स्योरेन्स लिमिटेडले चालु आर्थिक वर्षको पहिलो त्रैमासको वित्तिय विवरण सार्वजनिक गरेको छ। प्रकाशित विवरण अनुसार कम्पनीको नाफा गत आर्थिक वर्षको पहिलो त्रैमासको तुलनामा चालु आर्थिक वर्षमा १ दशमलव ६० प्रतिशतले वृद्धि भएको छ । गत आर्थिक वर्ष पहिलो त्रैमासमा ७ करोड ३ लाख नाफा कमाएको कम्पनीले चालु आर्थिक वर्षको सोही अवधिमा ७ करोड १४ लाख कमाएको छ ।
कम्पनीले ३ महिनाको अवधिमा १ अर्ब ५० करोड कुल बीमा शुल्क आर्जन गरेको छ । कुल बीमा शुल्क आर्जनमा १ अर्ब ८ करोड नवीकरण बीमा शुल्क र ४१ करोड ६० लाख प्रथम बीमाशुल्क रहेको छ । कुल बीमा शुल्क आर्जन गत आर्थिक वर्षको पहिलो त्रैमासको तुलनामा २ दशमलव ६९ प्रतिशले वृद्धि भएको छ भने प्रथम बीमा शुल्क भने १४ दशमलव ३९ प्रतिशतले घटेको छ । नवीकरण बीमा शुल्कमा भने ११ दशमवल १७ प्रतिशतको वृद्धि देखिएको छ । पुनर्बीमा गरेर कम्पनीले १ अर्ब ४२ करोड खुद बीमा शुल्क आर्जन गरेको छ ।
३ अर्ब ७५ करोड चुक्ता पुँजी भएको कम्पनीको शेयर प्रिमियममा १ अर्ब ५५ करोड, महाविपत्ति जगेडामा १४ करोड ५० लाख र अन्य जगेडामा ७० करोड ४३ लाख संचित गरेको छ । जीवन बीमा कोष ११ अर्ब ०७ करोड पुगेको छ। जुन ८ दशमलव २७ प्रतिशतको वृद्धि हो ।
प्रकाशित तथ्यांक अनुसार कम्पनीको प्रति शेयर आम्दानी ७ रुपैयाँ ६३ पैसा र किताबी मूल्य १८१ रुपैयाँ ४१ पैसा छ ।
