काठमाडौं । विनाशकारी भूकम्पका कारण कर्णाली प्रदेशको दुई जिल्लामा ३ हजार ४१ घर पूर्ण क्षतिग्रस्त भएका छन् । स्थानीय प्रशासनका अनुसार जाजरकोट र पश्चिम रुकुममध्ये सबैभन्दा बढी भाैतिक क्षति रुकुम पश्चिममा भएको छ।
रुकुम पश्चिममा शुक्रबारको ६ ४ रेक्टर स्केल क्षमताको भूकम्पले २ हजार १३६ घर पूर्ण क्षतिग्रस्त भएका छन् । जिल्ला प्रशासन कार्यालयका अनुसार २ हजार ६४२ घरमा आंशिक र ४ हजार ६७० सामान्य क्षति पुगेको छ । यसैगरी जाजरकोट जिल्ला प्रशासन कार्यालयका अनुसार जाजरकोटमा जिल्लामा भूकम्पबाट ३ हजार ६ सय ५० घरमा क्षति पुगेको छ । यीमध्ये ९ सय ५ घर पूर्णरुपले क्षतिग्रस्त भएका छन् । अधिकांश घरहरू कच्ची माटो, इँट्टा, ढुंगा र काठको प्रयोग गरी बनाइएका कमजोर संरचना भएका घरहरू भएकाले भूकम्पबाट ठूलो क्षति पुगेको अनुमान गरिएको छ ।
भूकम्पबाट दुई जिल्लामा १५७ जनाको ज्यान गएको छ। यीमध्ये जाजरकोटमा सर्वाधिक १०५ जना रहेका छन् । दुई सयभन्दा बढी घाइते छन् । भग्नावशेषमा अझै पनि मानिसहरु दबिएको हुनसक्ने आशंकामा उद्धारको प्रयास जारी रहेको छ। भूकम्पबाट भएको मानवीय र भाैतिक क्षति सम्बन्धी विवरण संकलनको कार्य अझै जारी रहेको स्थानीय प्रशासनले जानकारी दिएका छन् ।
