काठमाडौं । भारतको वित्त मन्त्रालयले सन् २०२४ को जनवरी-मार्च त्रैमासिकमा घाटामा रहेका सरकारी स्वामित्वका तीन निर्जीवन बीमा कम्पनी नेशनल इन्स्योरेन्स, ओरिएन्टल इन्स्योरेन्स र युनाइटेड इन्डिया एस्योरेन्स कम्पनीमा पूँजी थप्ने संभावना व्यक्त गरिएको रहेको छ।
प्रेस ट्रस्ट अफ इन्डियाले तीन बीमा कम्पनीहरूको वित्तीय कार्यसम्पादनमा आधारमा राज्यले पूँजी थप गर्ने तयारी रहेको उल्लेख गरेको छ । सन् २०२२ मा पनि भारत सरकारले तीन बीमा कम्पनीलाई ५० अर्ब भारतीय रुपैयाँ पूँजी उपलब्ध गराएको थियो । योमध्ये नेशनल इन्स्योरेन्सलाई ३७ अर्ब भारतीय रुपैयाँ दिइएको थियो । यसैगरी ओरिएन्टल इन्स्योरेन्सलाई १२ अर्ब भारतीय रुपैयाँ र युनाइटेड इन्डिया एस्योरेन्सलाई १ अर्ब भारतीय रुपैयाँ दिइएको थियो ।
तीनवटै निर्जीवन बीमा कम्पनीहरूलाई आफ्नो वित्तीय कार्यसम्पादन सुधार्न भनिएको छ । उनीहरूको सोल्भेन्सी अनुपात १५०% को न्यूनतम आवश्यक अनुपात भन्दा तल भएकाले थप पूँजी दिएर याे अनुपातमा सुधार गर्ने सरकारी प्रयास रहेको छ। बीमकसँग उपलब्ध रहेको सम्पत्ती र बीमकले तिर्नुपर्ने दायीत्ववापत बराबरको रकमको अनुपातलाई सोल्भेन्सी अनुपात भनिन्छ। यसले वित्तीय दायीत्वको तुलनामा बीमकसँग कति पर्याप्त खुद सम्पत्ती छ भन्ने आंकलन गर्छ।
