काठमाडौं । वाणिज्य बैंकहरुले कार्तिक महिनाका लागि नयाँ ब्याजदर सार्वजनिक गरेका छन्। बैंकहरुले प्रकाशित गरेको सूचना अनुसार अधिकांश बैंकहरुको ब्याजदर घटेको छ । बैंकहरुले प्रकानश गरेको ब्याजदर अनुसार १४ वाणिज्य बैंकहरुले असोजको तुलनामा कार्तिकमा ब्याजदर घटाएका छन्। त्यसैगरी, ४ बैंकले असोज महिनाकै ब्याजदरलाई निरन्तरता दिने भएका छन् भने २ बैंकहरुले ब्याजदर बढाएका छन्।
२० बैंकहरुमध्ये असोज महिनाको तुलनामा सबैभन्दा बढी ब्याजदर घटाउने बैंक भने एभरेष्ट बैंक रहेको छ। बैंकले कार्तिकका लागि ब्याजदर १.८३ प्रतिशत विन्दुले घटाएको हो । असोज महिनामा ११ दशमलव ०५४ प्रतिशत रहेको बैंकको व्यक्तिगत मुद्दती निक्षेपको अधिकतम ब्याजदर, कात्तिक महिनामा ९ दशमलव २२४ प्रतिशतमा झरेको छ।
त्यसैगरी, प्राइम कमर्सियल बैंक, नबिल बैंक र नेपाल इन्भेष्टमेन्ट मेगा बैंकले पनि १ प्रतिशत विन्दुभन्दा बढी ब्याजदर घटाएका छन्। सिद्धार्थ बैंक, माछापुच्छ्रे बैंक, लक्ष्मी सनराइज बैंक र राष्ट्रिय वाणिज्य बैंकले भने असोज मसान्तकै ब्याजदरलाई निरन्तरता दिएका छन्।
नेपाल एसबिआई बैंक र एनएमबि बैंकले भने ब्याजदर बढाएका छन्। एनएमबि बैंकको ब्याजदर १ दशमलव ०१३ प्रतिशत विन्दुले बढेको होभने नेपाल एसबिआई बैंकको ब्याजदर ० दशलमव ७ प्रतिशतले बढेको हो ।
