काठमाडौं । बैंकहरुमा तरलता हुँदा हुँदै पनि ब्याज दर नघट्दा सोचे अनुरुपको कर्जा प्रवाह हुन सकेको छैन। जसको कारणले गर्दा बैंकमा पैसा थुप्रिन थालेको छ । नेपाल राष्ट्र बैंकले प्रकाशन गरेको तथ्यांकअनुसार बैंकहरुको सिडी रेशियो ८२ प्रतिशत भन्दा तल नै रहेको छ । असोज १७ गते ८१ दशमलव ९१ प्रतिशत रहेको सिडी रेशियो असोज १८ गते केही घट्दै ८१ दशमलव ८४ प्रतिशत पुगेको छ ।
बैंकहरुमा ५८ खर्ब ३० अर्ब निक्षेप रहेको छ। एकै दिन बैंकहरुमा रहेको निक्षेप ७ अर्बले बढेको छ । वाणिज्य बैंकमा एकै दिनमा सो परिमाणमा निक्षेप वृद्धि हुँदा समस्त प्रणालीमा निक्षेप वृद्धि भएको हो ।
निक्षेप वृद्धिको तुलनामा कर्जा प्रवाह भने सुस्त नै रहेको छ। कर्जा प्रवाह सो दिन २ अर्बले वृद्धि हुँदै ४९ खर्ब ४० अर्ब पुगेको छ ।
महँगो ब्याजको कारणले गर्दा कर्जा प्रवाह हुन सकेको छैन । आर्थिक क्रियाकलापमा कमी आउँदा कर्जाको माग सुस्त छ भने अहिले कर्जा लिन खोजेकाहरुपनि पर्ख र हेरको अवस्थामा छन् । ब्याज दर यसरी नै वृद्धि हुँदै जाने र बैंकमा लगानीयोग्य तरलता थुप्रिदै जाने हो भने बैंकको लागत वृद्धि हुने र लागत वृद्धिले मुनाफामा असर गर्ने सम्भावना पनि धेरै नै छ ।
