काठमाडौं । मल्टीपर्पस फाइनान्स लिमिटेडको हकप्रद शेयर बाँडफाँड भएको छ । कम्पनीले भदौ १० गतेदेखि भदौ ३१ गतेसम्म विक्री गरेको ३५ प्रतिशत हकप्रद शेयर असोज १२ गते बाँडफाँड गरेको हो ।
कम्पनीले हाल कायम चुक्तापूँजी ४५ करोड २० लाख रुपैयाँको आधारमा ३५ प्रतिशत अर्थात १५ करोड ८२ लाख रुपैयाँ बराबरको १५ लाख ८२ हजार कित्ता हकप्रद शेयर कम्पनीले निष्काशन गरेको थियो ।
कम्पनीले तोकिएको अवधिभित्र रितपूर्वक आवेदन दिएका ४ हजार ३२८ जना शेयरधनीहरूमा १४ लाख ३९ हजार २२७ कित्ता हकप्रद शेयर बाँडफाँड गरेको हो । हकप्रद शेयर बाँडफाँडमा नपरेको रकम असोज १६ गतेदेखि सम्बन्धित शेयरधनीहरूको बैंक खातामै रकमान्तर गरिने कम्पनीले जनाएको छ ।
हकप्रद शेयर निष्काशन प्रयोजनका लागि कम्पनीले साउन १२ गते एक दिन बुक क्लोज गरेको थियो । कम्पनीको हकप्रद शेयर निष्काशन तथा विक्री प्रबन्धकमा मुक्तिनाथ क्यापिटल रहेको छ ।
कम्पनीले हकप्रद शेयर विक्री खुला गर्दा वितरण हुन नसकेको १ लाख ४२ हजार ७७३ कित्ता हकप्रद शेयर लिलामी प्रक्रियबाट विक्री गरिने जनाएको छ ।
