काठमाडौं । वैदेशिक रोजगारीका लागि कुवेत, जोर्डन जान लागेका श्रमिकलाई बिना आधार त्रिभुवन अन्तराष्ट्रिय विमानस्थल, अध्यागमन कार्यालयले रोकेको भन्दै वैदेशिक रोजगार विभागले असन्तुष्टि व्यक्त गरेको छ । विभागबाट एकै प्रकृतिका कागजातको आधारमा एउटै लटमा श्रम स्वीकृती लिई प्रस्थानका लागि एयरपोर्ट पुगेका व्यक्तिहरुमध्ये कसैलाई प्रस्थानको अनुमति दिएको कसैलाई नदिएको भन्दै विभागले असन्तुष्टि व्यक्त गरेको हो ।
वैदेशिक रोजगारीमा गएकाले पठाएको विप्रेषणबाट देशको अर्थतन्त्र चलायमान रहेको भन्दै लामो प्रक्रिया पुरा गरी वैदेशिक रोजगारीका लागि विमानस्थल पुगेका श्रमिकलाई विना आधार विमानस्थलबाट फर्काइनुलाई विभागले गलत भएको जनाएको छ । इजाजत पत्र प्राप्त गरेका संस्थाले श्रम स्वीकृति लिई श्रमिकलाई गलत स्थान वा गलत कागजातका आधारमा वैदेशिक रोजगारमा पठाएमा उक्त संस्थालाई क्षतिपूर्ति, जरिवाना तथा कैद सजायको व्यवस्था गरिएको छ । यस अवस्थामा अध्यागमनबाट श्रमिकलाई फिर्ता पठाउनु मनासिब नरहेको विभागले जनाएको छ ।
