काठमाडौं । नेपाल बीमा प्राधिकरणले निर्देशक सुशिलदेव सुवेदीलाई इन्स्योरेन्स इन्स्टिच्युट नेपालको प्रमुख कार्यकारी अधिकृतको जिम्मेवारी प्रदान गरेको छ । भोजराज शर्माको कार्यकाल यहि असार मसान्तबाट सकिदैछ ।
उनको कार्यकाल सकिए लगत्तै लागु हुने गरी बीमा प्राधिकरणले सुवेदीलाई थप जिम्मेवारी प्रदान गर्दै इन्स्टिच्युटको सिइओमा नियुक्त गरेको हो । उनलाई भारतीय विश्वविद्यालयबाट बीमा कलेज सञ्चालनका लागि अनुबन्धन लिने जिम्मेवारी प्रदान गरिएको छ । चालु आर्थिक वर्षको बजेटमै बीमा कलेज स्थापना गर्ने कार्यक्रम समावेश गरिएको थियो । नेपालका विश्व विद्यालयले बीमा मात्रै अध्ययन गर्ने गरी अनुमति नदिने भएकाले भारतीय विश्व विश्वविद्यालयबाट एफिलिएसन लिने प्रकृया अगाडी बढाएको हो ।
बीमा कम्पनीहरुमा दक्ष जनशक्ति उत्पादन गर्ने उद्देश्य सहित बीमा कलेजको अवधारणाको विकास भएको हो । बीमा सम्बन्धी आवस्यक तालिम उपलब्ध गराउन बीमा प्राधिकरण सहित बीमा कम्पनीहरुको सामुहिक लगानीमा इन्स्योरेन्स इन्स्टिच्युटको स्थापना गरिएको थियो । बीमा क्षेत्रका सबैभन्दा पाका तथा अनुभवी शर्मालाई प्राधिकरणले प्रमुख कार्यकारी अधिकृतको जिम्मेवारी प्रदान गर्दै आएको थियो ।
प्राधिकरणका निर्देशक सुवेदी प्राज्ञीक क्षेत्रमा पनि संलग्न छन् । यहि कारणले पनि उनलाई प्राधिकरणले यस्तो जिम्मेवारी दिएको हो । सुवेदीले बीमा प्राधिकरणमा बहन गर्दै आएको जिम्मेवारीलाई पनि पुरा गर्नु पर्नेछ । इन्स्टिच्युटको सिइओमा नियुक्त भए पनि उनले पारिश्रमक तथा सेवा सुविधा भने प्राधिकरणबाटै बुझ्ने छन् ।
