भारत भ्रमणको क्रममा आफूले भारतले संसद भवनमा राखेको नक्साबारे गम्भिरतापूर्वक कुरा उठान गरेको प्रधानमन्त्री पुष्पकमल दाहाल प्रचण्डले बताए । आज राष्ट्रिय सभामा सम्बोधन गर्दै उनले भारतले राखेको नक्साबारे आफूले कुरा उठान गरेको बताए । नक्सा बारे आफूले धेरै अध्ययन गरेको थिएन, तर मिडियामा आएको विषय अनुरुप नै आफूले नक्साबारे प्रश्न गरेको उनको भनाई छ ।
नयाँ संस्द भवनमा भारतले राखेको नक्साबारे विभिन्न कोण प्रति कोणबाट चर्चा भएको छ भन्दै आफुले कुरा राख्दा भारतको तर्फबाट राजनैतिक नभएको र यो ऐतिहासिक, साँस्कृतिक नक्सा भएको जवाफ आएको उनले बताए । यसबारे अध्ययन गर्ने र छलफल गर्न बाँकी नै रहेको प्रधानमन्त्रीको भनाई छ । भारत भ्रमणको क्रममा यसबारे कुरा नउठेको, छलफल नभएको भन्ने कुरा साँचो नभएको समेत उनको भनाई छ ।
