काठमाडौं । मेन्छियाम हाइड्रोपावर लिमिटेडको आइपीओ भोलि बैशाख १३ गते बुधवार बाँडफाँड हुँदैछ । बुधवार बिहान १०ः३० बजे लैनचौर ब्यांक्वेटमा आईपीओ बाँडफाँड गर्ने बिक्री प्रबन्धक एनआईसी एसिया क्यापिटल मार्केटले जनाएको हो ।
कम्पनीको आइपीओमा मागभन्दा १४ दशमलव ४४ गुणा बढी आवेदन परेको छ । त्यसकारणा आइपीओ गोलाप्रथाको माध्यमबाट बाँडफाँड हुनेछ । कम्पनीको आइपीओमा १२ लाख २८ हजार २०० जनाले कुल १ करोड ३५ लाख ७ हजार ९६० कित्ताको लागि आवेदन दिएका छन् ।
तीमध्ये ९३ हजार ४९१ जनाले मात्र १० कित्ताका दरले शेयर पाउनेछन् भने थप पाँच कित्ता शेयर पाँच जना आवेदकमा १/१ कित्ताका दरले थप हुनेछ । बाँकी ११ लाख ३४ हजार ७०९ जनाको हात भने खाली हुनेछ ।
कम्पनीले वैशाख ४ गतेदेखि ७ गतेसम्म १६ करोड २७ लाख ७५ हजार रुपैयाँ बराबरको १६ लाख २७ हजार ७५० कित्ता आइपीओ निष्काशन गरेको थियो ।
