काठमाडौं । दोल्ती पावर कम्पनी लिमिटेडको आइपीओ आज बाँडफाँड हुँदैछ । कम्पनीले सर्वसाधारणमा सार्वजनिक निष्काशनमार्फत विक्री गरेको आइपीओ बैशाख ८ गते आज शुक्रवार बाँडफाँड गर्ने जनाएको छ ।
एनआईसी एशिया क्यापिटल लिमिटेडले दिउँसो ३ बजे काजीको किचेन बत्तिसपुतली, काठमाडौंमा आईपीओ बाँडफाँड गर्ने जनाएको छ । कम्पनीले सर्वसाधारणमा चैत २८ गतेदेखि वैशाख ३ गतेसम्म आइपीओ विक्री गरेको थियो ।
सर्वसाधारणमा विक्री गरिएको १२ लाख ७१ हजार ८६१ कित्ता कम्पनीको आईपीओ खरीदका लागि १३ लाख ३९ हजारभन्दा बढीले १ करोड ४७ लाखभन्दा बढी कित्ता शेयर खरीद माग गरेका छन् । मागभन्दा बढी आवेदन परेकाले कम्पनीको आईपीओ गोलाप्रथाको माध्यमबाट बाँडफाँड हुनेछ ।
कम्पनीले जारी पूँजी ५३ करोड ६४ लाख ८६ हजार रुपैयाँको ३० प्रतिशत दरको १६ लाख ९ हजार ४५८ कित्ता शेयर आयोजना प्रभावित स्थानीयसहित सर्वसाधारणमा जारी गर्न नियामक निकाय नेपाल धितोपत्र बोर्डबाट अनुमति पाएको थियो । पहिलो चरणमा आयोजना प्रभावित स्थानीयमा १ लाख ४१ हजार ८२० कित्ता र वैदेशिक रोजगारीमा रहेका नेपालीमा १ लाख ७ हजार २९८ कित्ता शेयर बाँडफाँड भइसकेको छ ।
स्थानीयका लागि कम्पनीले ५ लाख ३६ हजार ४८६ कित्ता शेयर विक्री खुला गरेको थियो । स्थानीयमा वितरण हुन नसकेको बाँकी शेयरसमेत सर्वसाधारणमा थप गरी विक्री गरिएको हो । कम्पनीका कर्मचारीका लागि छुट्याइएको शेयरसमेत बाँडफाँड गरिसकेको कम्पनीले सामूहिक लगानी कोषका लागि ६८ हजार १७ कित्ता शेयर सुरक्षित गरेको छ ।
