काठमाडौ । कुनै समय कर्जा निक्षेप अनुपात (सिडी रेसियो) ९०% पुग्दा बैंकहरुमा नयाँ कर्जा प्रवाह गर्नु परको कुरा, कुनै ठुलो निक्षेपकर्ताले पैसा झिके के होला भन्ने तनाबको अवस्था हुँदा अहिले भने बैंकमा केही तरलता बढ्न थालेको संकेत मिलेको छ ।
नेपाल राष्ट्र बैंकले प्रदान गरेको मार्च १२ सम्मको तथ्यांक हेर्दा वाणिज्य बैंकको सिडी रेसियो ८५ दशमलव ८६ प्रतिशत छ । अघिल्लो दिन अर्थात् मार्च ११ मा सिडी रेसियो ८५ दशमलव ९७ थियो । यसरी ८६% तल सिडी रेसियो आउनुलाई सकारात्मक रुपमा लिन सकिन्छ ।
राज्यले गरेको आयातमा कडाईका कारण देशबाट बाहिरिने रकम घटेको र रेमिटेन्स राम्रो मात्रामा आएसंगै प्रणालीमा तरलता वृद्धि भएको हो । त्यस्तै उच्च ब्याजमा अहिलेको अवस्थामा ऋण लगेर व्यवसाय गर्न गाह्रो पर्ने भएकाले पनि बजारमा कर्जाको माग पनि केही कम रहेको छ ।
हाल प्रणालीमा ५३ खर्ब ८८ अर्ब निक्षेप हुँदा ४८ खर्ब ९ अर्ब कर्जा प्रवाह भएको छ । अन्तर बैंक ब्याज दर भने ७ प्रतिशत रहेको छ ।
