काठमाडौं । कुमारी बैंक लिमिटेडको २ लाख ९६ हजार कित्ता संस्थापक शेयरमा आवेदन दिने समय लम्बिएको छ । बैंकले उक्त शेयर फागुन १६ गतेदेखि विक्रीमा ल्याएको हो ।
कम्पनीले विद्यमान संस्थापक शेयरधनीहरूसँगै अन्य व्यक्ति तथा संस्थाले खरीद गर्न पाउने गरी यो शेयर विक्रीमा ल्याएको हो । यसअघि फागुन ३० गतेसम्मको विक्री अवधि गरिएकोमा अब चैत ६ गतेसम्म आवेदन दिन सकिनेछ ।
उक्त शेयरको प्रतिकित्ता मुल्य २१९ रुपैयाँ तोकिएको छ । उक्त शेयर खरीदका लागि ईच्छुक लगानीकर्ताले तोकिएको मूल्य वा सोभन्दा बढी मूल्य अंकित गरी गोप्य शिलबन्दी बोलपत्र पेश गर्नुपर्नेछ । बोलपत्र विक्री प्रबन्धक कुमारी क्यापिटल लिमिटेडको नागपोखरी नक्साल, काठमाडौंस्थित कार्यालयमा पेश गर्नुपर्ने बैंकले जनाएको छ ।
बोलपत्र पेश गर्दा न्यूनतम १० हजार कित्तादेखि अधिकतम सम्पूर्ण कित्तासम्म माग गर्नुपर्नेछ । आवेदन दिनेले अनिवार्य रुपमा आफ्नो प्यान नम्बर आवेदन फारममा उल्लेख गर्नुपर्ने कम्पनीले जनाएको छ । शिलबन्दी खाम बाहिर आवेदनकर्ताले कुमारी बैंक लिमिटेडको संस्थापक शेयर खरीद आवेदनसमेत उल्लेख गर्नुपर्नेछ ।
