काठमाडौं । तीन जलविद्युत् कम्पनीको आइपीओ खरीद गर्ने आज फागुन २५ गते अन्तिम दिन रहेको छ । यी तीन कम्पनीले वैदेशिक रोजगारीमा रहेका नेपालीका लागि आइपीओ विक्री गरेको हो । दोल्ती पावर कम्पनी, भूगोल इनर्जी डेभलपमेन्ट र मेन्छियाम हाइड्रोपावर लिमिटेडको आइपीओमा वैदेशिक रोजगारीमा रहेका नेपालीले आज फागुन २५ गतेसम्म मात्र आवेदन दिन पाउनेछन् ।
दोल्ती पावर र भूगोल इनर्जीले फागुन ८ गतेदेखि र मेन्छियाम हाइड्रोपावरले फागुन १० गतेदेखि पहिलो चरणको आईपीओ जारी गरेका हुन् । पहिलो चरणमा वैदेशिक रोजगारीमा गएका नेपाली र आयोजना प्रभावित स्थानीयमा यी कम्पनीहरूले आइपीओ निष्काशन गरेका हुन् ।
आयोजना प्रभावित स्थानीयका लागि पनि आईपीओ विक्री अवधि फागुन २५ गतेसम्म तोकिएको छ । यस अवधिसम्म मागबमोजिम स्थानीय बासिन्दाको आवेदन नपरेमा भने दोल्ती पावर र भूगोल इनर्जीको लागि चैत ७ गते एवं मेन्छियाम हाइड्रोपावरको लागि चैत ९ गतेसम्म विक्रीमा रहने छ।
दोल्ती पावरले आयोजना प्रभावित स्थानीयका लागि ५ लाख ३६ हजार ४८६ कित्ता र वैदेशिक रोजगारीमा रहेका नेपालीका लागि १ लाख ७ हजार २९८ कित्ता शेयर जारी गरेको हो । त्यस्तै भूगोल इनर्जीले आयोजना प्रभावित स्थानीयका लागि ५ लाख ४४ हजार ५३ कित्ता र वैदेशिक रोजगारीमा रहेका नेपालीका लागि १ लाख ८ हजार ८११ कित्ता शेयर जारी गरेको हो ।
मेन्छियाम हाइड्रोपावरले आयोजना प्रभावित स्थानीयका लागि ५ लाख ४२ हजार ५८३ कित्ता र वैदेशिक रोजगारीमा रहेका नेपालीका लागि १ लाख ८ हजार ५१७ कित्ता आइपीओ जारी गरेको हो ।
यी तीन वटै कम्पनीको आइपीओ विक्री प्रबन्धकमा एनआईसी एशिया क्यापिटल लिमिटेड रहेको छ ।
