काठमाडौं । फागुन २५ गते (बिहिबार) हुने राष्ट्रपति निर्वाचनका लागि तयारी पुरा भएको छ । निर्वाचनका लागि आवश्यक जनशक्ति, प्राविधिक लगाएत सम्पूर्ण तयारी अन्तिम चरणमा पुगेको निर्वाचन आयोगले जनाएको छ ।
बानेश्वरस्थित संसद भवनको ल्होत्से हलमा हुने मतदानका लागि सङ्घीय संसद र प्रदेशसभा सदस्यका लागि छुट्टा छुट्टै मतदान केन्द्र निर्माण गरिएको छ । निर्वाचनलाई व्यवस्थित बनाउन छुट्टा छुट्टै मतदान केन्द्रको व्यवस्थापन गरिएको आयोगले जनाएको छ ।
राष्ट्रपति पदका लागि नेपाली कांग्रेसका बरिष्ठ नेता रामचन्द्र पौडेल र नेकपा (एमाले) का तर्फबाट उपाध्यक्ष सुवासचन्द्र नेम्बाङले उम्मेदवारी दिएका छन् । निर्वाचनका लागि पौडेलको तर्फबाट रमेश लेखक र नेम्वाङका तर्फबाट महेश बर्ताैला प्रतिनिधिको रुपमा रहेका छन् ।
मतदान भने विहान १० देखि दिउँसो ३ बजेसम्म हुनेछ । मतदान कार्य सम्पन्न भएसँगै मतगणना कार्य सुरु गर्ने र साँझ ७ बजेभित्र परिणाम घोषणा गर्ने आयोगले जनाएको छ ।
