काठमाडौं । राष्ट्र बैंकले पाँच बैंकलाई कारबाही गरेको छ । शंकास्पद पैसा ओसारपसार गरेको आरोपमा प्रहरी हिरासतमा रहेका पृथ्वीबहादुर शाह, उनका निकटतम व्यक्ति र संस्थाको रोक्का रहेको बैंक खाताबाट रकम निकाल्न अनुमति दिने र खाता खोल्ने ५ वाणिज्य बैंकलाई राष्ट्र बैंकले कारबाही गरेको हो ।
सम्पत्ति शुद्धीकरण निवारण सम्बन्धमा जारी निर्देशन उल्लंघन गरेको आरोपमा कुमारी बैंक, प्राइम कमर्सियल बैंक, प्रभु बैंक, साविकको बैंक अफ काठमाण्डू (बीओके) र नबिल बैंकलाई राष्ट्र बैंकले कारबाही गरेको हो ।
राष्ट्र बैंकले गत पुस २२ गते सम्बन्धित बैंकलाई कारबाहीको पत्र पठाएको थियो । रोक्का खाताबाट पैसा निकाल्न दिने कुमारी बैंक, प्राइम कमर्सियल बैंक, प्रभु र बीओके बैंकलाई सचेत गराउँदै ५० /५० लाख रुपैयाँको दरले नगद जरिवाना गरिएको छ भने नबिल बैंकलाई भने राष्ट्र बैंकले सचेत मात्र गराएको छ ।
नविल बैंकलाई खाता रोक्का राख्न निर्देशन दिएपछि पनि नयाँ खाता खोलेको भन्दै राष्ट्र बैंकले अबदेखि यस्तो गल्ति नगर्न भनी सचेत गराउँदै नगद जरिवाना नगरेको हो ,
शाहले शंकास्पद रूपमा विदेशबाट पैसा ओसारपसार गरेको आशंकामा राष्ट्र बैंकले ०७७ चैत १९ मा सबै बैंक तथा वित्तीय संस्थालाई निर्देशन दिएर उनी र उनका निकटतम व्यक्ति र संस्थाका सबै खाता रोक्का गर्न निर्देशन दिएको थियो ।
