काठमाडौं । कृति भेन्चर फण्ड लिमिटेडले माघ २२ गते विशेष साधारण सभा आयोजना गर्ने जनाएको छ । गत माघ ४ गतेको कम्पनीको सञ्चालक समितिको बैठकले माछापुच्छ्रे क्यापिटल लिमिटेडको कार्यालय, काठमाडौंमा दिउँसो १ बजे सभा गर्ने निर्णय गरेको हो ।
कृति भेन्चर फण्डले प्रिमियम मूल्यमा आइपीओ जारी गर्ने प्रस्ताव सहित उक्त सभा आयोजना गर्न लागेको हो । कृति भेन्चर फण्ड लिमिटेडको मुख्य लगानीकर्ता टिम भेन्चर प्रालि हो ।
फण्डले १ बराबर शून्य दशमलव ४० को अनुपातमा ८ लाख कित्ता हकप्रद शेयर पुस ३० गतेदेखि विक्री खुला गरेको हो । प्रतिकित्ता १०० रुपैयाँ अंकित दरको उक्त हकप्रद शेयर खरीदका लागि फागुन ५ गतेसम्म आवेदन दिन सक्नेछन् ।
कम्पनीको हकप्रद शेयर खरीदका लागि कम्पनीको रजिष्टर्ड कार्यालय बागदरबार, काठमाडौंबाट दरखास्त फारम लिई बैंकमा रकम जम्मा गरेको भौचरसमेत राखी पठाउनुपर्नेछ ।
